Адыгэ Республикэм и ЛIышъхьэ ишIухьафтынмэ якъыдэхын фэгъэхьыгъэ футбол ешIэгъухэр кIэухым фэкIох. Ящэнэрэ чIыпIэр «Кощхьаблэм» къыдихыгъ. Финалым Адыгэкъалэрэ Инэмрэ яфутбол командэхэр щызэдешIэщтых.
«Кощхьабл» - «Еджэркъуай» - 4:3.
Iоныгъом и 2-м Мыекъуапэ щызэдешIагъэх.
Къэлапчъэм Iэгуаор дэзыдзагъэхэр: Акъущэ Байзэт, Брыцу Руслъан, Дэгужъые Рэмэзан - «Еджэркъуай»; Тхьаркъохъо Казбек, Куфэнэ Рэмэзан (тIогъогогъо), Агъырджэнэкъо Адам - «Кощхьабл».
Футболыр къэзыгъэдахэрэмэ ащыщ ешIэгъур пчъагъэу зэраухыщтыр къэшIэгъуаеу къызэрэхэкIырэр. Еджэркъуаемэ къэлапчъэм Iэгуаор тIогъогогъо дадзагъэу, 2:0-у зэIукIэгъур ахьыщтыгъ. Пчъагъэм зэрэхагъэхъощтым пылъхэу апэкIэ илъыщтыгъэх. Кощхьаблэмэ ящэнэрэу Iэгуаор якъэлапчъэ дагъэкIыщтми е еджэркъуаехэм якъэлапчъэ Iэгуаор дадзэщтми зыми ышIэщтыгъэп. «Кощхьаблэм» ифутболистэу Тхьаркъохъо Казбек пчъагъэр зэрихъокIыгъ - 1:2. Бэ темышIэу Куфэнэ Рэмэзанэ хъагъэм Iэгуаор ридзагъ - 2:2.
- Еджэркъуаемэ янасып къымыхьыгъэу плъытэщтми сшIэрэп, - еIо зэнэкъокъум исудья шъхьаIэу Пэнэшъу Мыхьамодэ. - Пчъагъэр 2:2 хъугъэу еджэркъуаемэ яфутболист пенальтикIэ къэлапчъэм Iэгуаор дидзэн ылъэкIыгъэп. Кощхьаблэмэ ар агъэфеди, зэгурыIоныгъэ ахэлъэу нахьыбэрэ апэкIэ къылъыкIуатэхэу фежьагъэх, текIоныгъэри къыдахыгъ.
ЕМТIЫЛЪ Нурбый.